കാൻസർ ചികിത്സയും അതിന്റെ പാർശ്വഫലങ്ങളും പലപ്പോഴും കാൻസർ എന്ന രോഗത്തെ പോലെ തന്നെ നമ്മെ ഭയപ്പെടുത്തുന്ന ഒന്നാണ്. അവയെ മറികടക്കുക എന്ന ലക്ഷ്യവുമായി ലോകത്തിന്റെ വിവിധ കോണുകളിൽ നടക്കുന്ന ഗവേഷണങ്ങളിൽ വളരെയധികം പ്രതീക്ഷ നൽകുന്ന ഒന്നാണ് നാനോ മെറ്റീരിയലുകൾ കൊണ്ടുളള നൂതന ചികിത്സാരീതികൾ. പ്രകൃതി സൗഹൃദ നാനോ ഗോൾഡ് ഉപയോഗിച്ചുകൊണ്ടുളള ടാർഗറ്റഡ് കാൻസർ തെറാപ്പിയാണ് എന്റെ ഗവേഷണ വിഷയം. പ്രകൃതിദത്ത സ്രോതസ്സുകൾ ഉപയോഗിച്ച് നിർമ്മിച്ചെടുക്കുന്ന ഈ നാനോ ഗോൾഡ് മെറ്റീരിയലുകൾ കീമോതെറാപ്യൂട്ടിക് മരുന്നുകളെ കൃത്യമായി കാൻസർ കോശങ്ങളിലേക്ക് എത്തിക്കുന്ന സ്മാർട്ട് ഡ്രഗ് ഡെലിവറി വെഹിക്കിൾസ് ആയി പ്രവർത്തിക്കുന്നു. തികച്ചും പരിസ്ഥിതി സൗഹൃദപരമായി നിർമ്മിക്കുന്നതുകൊണ്ട് തന്നെ ഇവ സുരക്ഷിതവുമാണ്. ഈ നൂതന ചികിത്സാരീതി കാൻസർ കോശങ്ങളിലേക്ക് നേരിട്ട് ചികിത്സ എത്തിക്കുവാനും പാർശ്വഫലങ്ങൾ കുറയ്ക്കുന്നതിനൊപ്പം തന്നെ ഫലപ്രാപ്തി മെച്ചപ്പെടുത്തുന്നതിനും സഹായകരമാകും. ആത്യന്തികമായി കാൻസർ ചികിത്സയുടെ വെല്ലുവിളികൾക്ക് പരിഹാരമാവുക എന്നതാണ് ഈ ഗവേഷണത്തിൻ്റെ പ്രധാന ലക്ഷ്യം.