ക്യാൻസർ രോഗികളുടെ ഹൃദയാരോഗ്യത്തിന് കൂണുകൾ എങ്ങനെ ഫലപ്രദമാകും എന്നുള്ളതാണ് എന്റെ ഗവേഷണ വിഷയം . കീമോതെറാപ്പി നടത്തി വരുന്ന ക്യാൻസർ രോഗികളിൽ ഹൃദ്യാഘാതവും മറ്റു ഹൃദയ സംബന്ധ രോഗങ്ങളും സ്ഥിരം വിരുന്നുകാരാണ് . കുറുന്തോട്ടിക്ക് തന്നെ വാതം പിടിച്ചാൽ എന്തുചെയ്യാനാലേ? ഇവയിൽ നിന്നും മോചനം ലഭിക്കാൻ ആയി കീമോതെറാപ്പി ഒഴിവാക്കുക എന്നത് സംഭവ്യമല്ല. ആയതിനാൽ ഈ ആഘാതങ്ങളെ ചെറുത്ത് നിൽക്കുവാനുള്ള മറുമരുന്ന് കണ്ടുപിടിക്കുകയാണ് ഏക മാർഗ്ഗം. അങ്ങനെ ഞങ്ങളുടെ ഗവേഷണ കേന്ദ്രത്തിൽ നടത്തിയ പഠനങ്ങളെ ആസ്പദമാക്കി ഹിമാലയ ചൈന ഭാഗങ്ങളിലായി കാണപ്പെടുന്ന മോർഷെല്ല എസ്ക്യൂലെന്റ അഥവാ ‘ഗുച്ചി’ എന്ന ഭക്ഷണയോഗ്യമായ കൂണിന്റെ ഹൃദയസംരക്ഷണപാടവത്തെയും അതിന്റെ പ്രവർത്തനത്തെ കുറിച്ചും ആണ് എന്റെ അവതരണം. ചൈനക്കാർ പരമ്പരാഗത ചികിത്സയിൽ ഉൾപ്പെടുത്തിയിട്ടുള്ള ഈ കേമനെ കുറിച്ചാവട്ടെ നമ്മുടെ ചർച്ചാവിഷയം.